Mae Cymru'n wynebu storm berffaith, argyfwng gwledig, argyfwng hinsawdd, ac argyfwng cyfleoedd.

Yng Nghanolbarth Cymru, mae cymunedau mewn perygl o ddiflannu wrth i bobl ifanc symud i ffwrdd i chwilio am waith. Mae chwarter y gweithwyr lleol yn ennill llai na'r cyflog byw, a thrigolion dros 60 oed yn uwch na chyfartaledd y DU, gan roi pwysau ar ofal a gwasanaethau sydd eisoes yn brin a than bwysau. Wrth i siopau, ysgolion a llwybrau bysiau gau, gan gynyddu achosion o ynysu a thrychinebau cymdeithasol ac economaidd flwyddyn ar ôl blwyddyn.

Ar yr un pryd, mae newid hinsawdd yn taro cefn gwlad Cymru yn galed wrth i lifogydd, costau cynyddol a thywydd newidiol fygwth cartrefi, ffermydd a bywoliaethau. Mae 74% o oedolion Cymru yn dweud eu bod yn poeni am yr hinsawdd, ond yn rhy aml nid oes ganddynt yr offer, y rhwydweithiau na'r cyfleoedd i wneud gwahaniaeth.

Yn y cyfamser, mae’r celfyddydau a diwylliant; sef rhai o'n cryfderau mwyaf yn cael eu tanariannu a'u tanbrisio. Mae Cymru ymhlith y gwledydd isaf yn Ewrop o ran buddsoddiad cyhoeddus mewn diwylliant. Mae artistiaid sy'n dod i'r amlwg yn cael trafferthion wrth geisio dod o hyd i ofodau, cefnogaeth neu welededd. Ac eto creadigrwydd yw un o'r grymoedd mwyaf pwerus sydd gennym i gyflwyno gobaith, cysylltiad a newid.

Dyma lle gall Ymddiriedolaeth y Dyn Gwyrdd wneud gwahaniaeth.

Ni yw cangen elusennol ‘gydol y flwyddyn’ Gŵyl y Dyn Gwyrdd, cangen sydd wedi'i gwreiddio yng Nghymru ac wedi'i gyrru gan y gred y gall creadigrwydd, cyfleoedd a chymuned drawsnewid bywydau. Rydyn ni'n dod â phobl at ei gilydd trwy’r celfyddydau, gwyddoniaeth, trwy weithredu ar newid hinsawdd, ailsgilio a phrosiectau cymunedol sy'n creu cyfleoedd lle mae ei angen fwyaf.

Mae’r Dyn Gwyrdd yn frand byd-eang dylanwadol sydd wedi'i ymgorffori yng Nghymru, ac sy’n cael ei gefnogi gan sefydliad aml-sgiliau. Mae'n un o gyflogwyr mwyaf Canolbarth Cymru, sy'n cwmpasu twristiaeth, lletygarwch, lles, gwyddoniaeth, iechyd a diogelwch, adeiladu dros dro, diwylliant a phob agwedd ar y diwydiannau creadigol. Mae Ymddiriedolaeth y Dyn Gwyrdd yn adeiladu ar yr amrywiaeth, y profiad a'r llwyddiant hwn i greu cyfleoedd yng Nghymru drwy weithredu cymunedol wedi'i dargedu, hyfforddiant, ymgysylltiad â sefydliadau gwyddoniaeth blaenllaw a thrwy arddangos a datblygu artistiaid sy'n dod i'r amlwg.

CYMUNEDAU

Mynd i’r afael ag Anghydraddoldeb yng Nghymru

DATBLYGU’R CELFYDDYDAU

Cefnogi artistiaid sy’n dod i’r amlwg ym maes Cerddoriaeth, y Celfyddydau Perfformio a’r Celfyddydau Gweledol

HYFFORDDIANT

Pobl ifanc a bregus, ffoaduriaid a cheiswyr lloches

GWYDDONIAETH A HINSAWDD

Cysylltu pobl â’r argyfwng hinsawdd, gwyddoniaeth ac iechyd

Ers 2014…

- 13,256+ o bobl wedi cael eu cynorthwyo

- £2,465,000 + wedi ei godi ar gyfer ein prosiectau

- 5,837 + o artistiaid

- 2,060 + o leoliadau hyfforddi

- 319 + o brosiectau gwyddoniaeth a hinsawdd

- £228,500 + wedi ei roi yn rhodd i brosiectau cymunedol

Darllenwch Adroddiad Effaith ein dengmlwyddiant

‘Mae pobl yn gofyn imi beth yw'r gwahaniaeth rhwng Gŵyl y Dyn Gwyrdd a'i changen elusennol sef Ymddiriedolaeth y Dyn Gwyrdd. Mae'n wir fod y ddwy yn dangos i’r byd gwlad pa mor anhygoel yw Cymru. Maen nhw’n datblygu'r celfyddydau, yn hyrwyddo'r Gymraeg, yn cefnogi cymunedau Cymru, a'r arloesiadau sy'n gwneud ein gwlad yn unigryw.'

'Mae ethos yr ŵyl yn debyg, ond mae'r Ymddiriedolaeth yn gweithredu ar wahân fel elusen gofrestredig a’i chenhadaeth yw datblygu uchelgeisiau dyngarol yr ŵyl trwy gydol y flwyddyn. Mae'n gwneud hyn drwy gyfeirio cyllid, profiad a chyfleoedd at brosiectau sy'n mynd i'r afael ag anghydraddoldeb a thlodi yng Nghymru, yr argyfwng hinsawdd a chefnogi datblygiad y celfyddydau. Mae'r Ymddiriedolaeth wedi cyflawni cymaint ac mae'r cynhesrwydd, yr onestrwydd a’r brwdfrydedd maen nhw'n ei gyfrannu i bopeth a wnânt yn ysbrydoliaeth i bawb sy'n cymryd rhan. Mae gweithio gydag Ymddiriedolaeth y Dyn Gwyrdd wedi bod yn brofiad anhygoel, ac rwy'n falch iawn o'u cyflawniadau a'r bobl sydd wedi helpu i wireddu cymaint o 'bethau da'. Cefnogwch ni os gallwch. Mae cymaint mwy y gallwn ei wneud a chyda'ch cymorth chi, gallwn lwyddo i’w gwireddu.'

Ein Hymddiriedolwyr

Sefydlodd Fiona Ymddiriedolaeth y Dyn Gwyrdd yn 2014 er mwyn mynd i'r afael â'r cynnydd mewn anghydraddoldeb, tlodi a diffyg cyfleoedd i bobl ifanc a bregus. Mae Fiona yn adnabyddus yn bennaf am ei chyfranogiad ym maes digwyddiadau awyr agored lle mae'n cael ei pharchu fel arloeswr. Mae hi yn safle 24 ar restr BBC Woman's Hour Music Power, a hi oedd y fenyw gyntaf i dderbyn y brif wobr sef 'Gwobr Cyfraniad Eithriadol i Wyliau'r DU,' a ddyfarnwyd yn flaenorol i John Peel, Peter Gabriel a Michael Eavis am ddatblygu'r cysyniad o ŵyl bwtîc. Dyfarnwyd gwobr cyflawniad oes iddi gan Access all Areas am ddatblygu'r Control Method, sef system weithredol ar gyfer diogelwch mewn gwyliau, sy’n cael ei defnyddio erbyn hyn ledled y byd. Hi yw'r unig fenyw yn y DU sy’n gyfrifol am reoli gŵyl gerddoriaeth fawr. Mae ei gyrfa hefyd yn cwmpasu twristiaeth, lletygarwch, bwyd a diod, hyfforddiant a lles ac mae hi wedi defnyddio hyn wrth ddatblygu cynlluniau hyfforddi ar gyfer pobl ifanc a difreintiedig.

Mae Ian wedi ymrwymo i gefnogi'r genhedlaeth nesaf o artistiaid ac mae'n eiriolwr dros genedlaethau'r dyfodol. Mae ganddo brofiad gweithredol helaeth ym maes busnes, cynhyrchu a'r celfyddydau, ar ôl bod yn gyfryngol i ddatblygiad y Dyn Gwyrdd, Film 4 yn Somerset House, Big Chill a digwyddiadau mawr eraill dros nifer o flynyddoedd. Hefyd ym maes lletygarwch, bwyd, diod ac iechyd a diogelwch. Fel un o sefydlwyr yr ymddiriedolaeth, mae wedi bod yn allweddol wrth ddatblygu ei gweinyddiaeth a’i phrosiectau. Mae Ian hefyd yn fentor allweddol, ar ôl chwarae rhan yn y gwaith o gyflwyno llawer o'n rhaglenni hyfforddi a'n rhaglenni celfyddydau dros y blynyddoedd.

Mae Natasha yn teimlo’n angerddol ynglŷn â sicrhau bod y diwydiannau creadigol yn ffynnu yng Nghymru a gofalu bod y sector yn hygyrch i bawb, waeth beth fo'u cefndir, eu hoedran neu eu gallu. Mae hi'n dod â chyfoeth o brofiad ym maes cerddoriaeth a ffilm ar raddfa ryngwladol, ar ôl chwarae rôl flaenllaw mewn cwmnïau cerddoriaeth a ffilm pwysig. Yn gynnar yn ei gyrfa, sefydlodd Natasha Sefydliad Cerddoriaeth Gymreig, gan gefnogi datblygiad cerddoriaeth Cymru, cyn symud ymlaen i greu isadran Diwydiannau Creadigol Llywodraeth Cymru ac mae hi wedi bod yn allweddol wrth ddatblygu sector ffilm llwyddiannus Cymru. Yna bu’n gweithio fel Prif Swyddog Gweithredu cwmni cynhyrchu ffilmiau Bad Wolf ac mae hi wedi bod yn allweddol wrth ei ddatblygu yn arweinydd byd-eang. Nid oes unrhyw agwedd o Ddiwydiannau Creadigol Cymru nad yw wedi elwa ar gefnogaeth Natasha Hale.

Mae Dan yn teimlo’n angerddol ynglŷn â’r celfyddydau, a chreu cyfleoedd i bobl ifanc a hyrwyddo Cymru yn rhyngwladol. Mae'n ymgynghorydd llawrydd sy'n gweithio gydag ystod o sefydliadau, gan ddarparu cymorth gydag arweinyddiaeth farchnata, cyfathrebu strategol a datblygu partneriaethau. Hyd at 2020, ef oedd Cyfarwyddwr Marchnata a Chyfathrebu Grŵp Acorn, un o brif gwmnïau recriwtio'r DU, swydd y bu ynddi am 16 mlynedd. Mae Dan yn Sylfaenydd a Chadeirydd Wythnos Cymru Llundain ac Wythnos Cymru Fyd-eang. Mae’n Gymrawd y Sefydliad Marchnata Siartredig ac yn Gymrawd yr RSA. Yn 2022, ymddangosodd enw Dan ar restr 100 Gwneuthurwr Newidiadau Gorau Cymru a chafodd wahoddiad i ddod yn Gymrawd y Sefydliad Materion Cymreig. Dyfarnwyd OBE iddo am ei Wasanaethau i Fusnesau yn 2019.

Mae Joanna yn teimlo’n angerddol ynglŷn â chyfiawnder cymdeithasol, ac mae ganddi ddiddordeb arbennig yn y gwaith y mae Ymddiriedolaeth y Dyn Gwyrdd yn ei wneud i fentora a hyfforddi pobl ifanc greadigol a'r gwaith gyda grwpiau bregus. Mae hi wedi bod yn eiriolwr ac yn arloeswr dros hawliau anabledd ers dros 30 mlynedd ac wedi bod yn rhan o'r newidiadau cadarnhaol mewn deddfwriaeth anabledd. Gwasanaethodd fel Cadeirydd Gwasanaeth y Gyfraith Anabledd am 10 mlynedd tan 2015, ac fel cyfreithiwr yn y Comisiwn Cydraddoldeb a Hawliau Dynol. Mae Joanna yn ddefnyddiwr cadair olwyn ac yn cefnogi enw da rhagorol y Dyn Gwyrdd am y ddarpariaeth mynediad i'r anabl – rheswm arall pam na feddyliodd hi ddwywaith cyn cymryd rhan yn Ymddiriedolaeth y Dyn Gwyrdd.