» Ein gwaith yng Nghymru «

Mae cefnogaeth gymunedol yn rhan o DNA’r Dyn Gwyrdd. Mae Ymddiriedolaeth y Dyn Gwyrdd yn gweithio mewn partneriaeth â’r ŵyl er mwyn mynd i’r afael â thlodi a’r anghydraddoldebau cymdeithasol a grëwyd gan y bwlch cyfoeth ac oedran yng Nghymru, drwy godi arian i’r rhai yr effeithir arnynt gan drychinebau naturiol, cefnogi ysgolion lleol a chanolfannau cymdeithasol, ac adeiladu cymunedau cynhwysol a chydnerth. Mae'r her yn un frawychus: erbyn 2040, bydd un o bob pedwar o bobl Cymru dros 65 oed; erbyn 2045, bydd y boblogaeth dros 90 oed yn dyblu. Bydd y galw am ofal yn saethu i fyny; Bydd angen 40,000 mwy o staff a 20,000 mwy o welyau. Mae gofal iechyd a gofal cymdeithasol eisoes dan straen.

Mae ein gwaith cymunedol yng Nghymru wedi gweld
- £72,825+ wedi'i roi drwy'r Gronfa Grantiau Cymunedol ym Mhowys ers 2023
- £10,500+ wedi'i godi at Ysgol Uwchradd Crucywel
- £3,000 i gefnogi cymorth i Wcráin
- £13,000 i fanciau bwyd yn 2022
- £16,000 o gyfraniad i deuluoedd yr effeithiwyd arnynt gan Storm Dennis yn 2020
- £50,000 wedi'i godi ar gyfer Ysgol Gynradd Llangatwg
- £60,000+ wedi'i godi yng Nghaffi Ymddiriedolaeth y Dyn Gwyrdd ar gyfer prosiectau lleol
- £280,000+ wedi'i roi gan Ŵyl y Dyn Gwyrdd ar ffurf lleiniau gwersylla, tocynnau a gwasanaethau am ddim i gefnogi mentrau codi arian lleol, gan gynnwys adnewyddu Neuadd Bentref Cwmdu.
Grantiau Cymunedol ar waith
Ers lansio'r Gronfa Grantiau Cymunedol yn 2023, rydym wedi cyfrannu £72,825+ i brosiectau lleol ym Mhowys, o weithdai iechyd meddwl i ofodau synhwyraidd ar gyfer myfyrwyr niwroamrywiol. Dyma ychydig yn unig o enghreifftiau:
- Arts Connection a The Honeypot – i gynnal Gwyliau Seibiant Preswyl a chynnig gweithdai creadigol i ofalwyr ifanc rhwng 5 a 12 oed
- Ysgolion Lleol yng Ngrughywel, Llangatwg a Llangynidr – gofodau synhwyraidd ac awyr agored newydd i blant a hyfforddiant i lansio gweithgareddau Ysgolion Coedwig
- Balchder Aberhonddu – i gefnogi dathliad cynhwysol
- Sense Cymru – helpu plant a chanddynt anableddau symudedd cymhleth
- Cyngor Cymuned Llangatwg – adfer ac ailwylltio ardal o laswelltir lleol
- Canolfan Gymunedol Llangors – uwchraddio cyfleusterau yn neuadd y pentref
- Gwasanaeth Ysgolion, Cyngor Sir Powys – lansio clwb cinio dydd Sul am ddim sy’n pontio’r cenedlaethau
- Theatr Fechan Aberhonddu – cynnig gweithdai haf i fyfyrwyr o Unedau Cyfeirio Disgyblion
- MPYT – cael pobl ifanc ag anableddau dysgu i gymryd rhan mewn gwaith theatr
- Re-Engage - sefydlu gwasanaethau cymorth i bobl hŷn 75+ oed ym Mhowys
- WildChild - treialu teithiau cerdded lles i oedolion hŷn a'r rhai sydd wedi’u hynysu
Astudiaeth Achos – Siop Gyfnewid Aberhonddu
Mae’r gofod hwn sydd yng nghanol Aberhonddu - mewn cynhwysydd llongau wedi'i ailbwrpasu - wedi dod yn un o'r prosiectau mwyaf effeithiol y mae Ymddiriedolaeth y Dyn Gwyrdd wedi'i gefnogi erioed: Siop Gyfnewid Gymunedol Aberhonddu.

Sefydlwyd y Siop Gyfnewid a agorodd yn 2024, oherwydd angen syml ond brys - roedd teuluoedd yn cael trafferth i gael dau ben llinyn ynghyd ac roedd angen rhywle croesawgar, heb stigma lle gallai unrhyw un roi'r hyn oedd ganddynt a chymryd yr hyn yr oedd ei angen arnynt. Heb arian. Heb farnu. Dim ond ysbryd cymunedol.

Aeth tîm y Dyn Gwyrdd ati i adnewyddu a datblygu’r cynhwysydd gan ddefnyddio deunyddiau wedi'u hailgylchu gyda gofal a bwriad. Defnyddiwyd murluniau, negeseuon o obaith ac o ddathlu’r gymuned i drawsnewid y waliau a gweddnewid y blwch metel yn ganolfan gynnes, fywiog llawn haelioni.

Yn gyflym iawn daeth y Siop Gyfnewid yn llinell bywyd ar gyfer:
- Teuluoedd sy'n cael trafferth gyda chostau byw, mae'n lle dibynadwy i gael mynediad at hanfodion heb stigma.
- Trigolion oedrannus sy'n teimlo'n ynysig, mae'n lle cynnes lle mae rhywun yn gwybod eu henw.
- Plant – mae’n lle hapus, cyfarwydd lle gallant chwarae, siarad a chael eu clywed.
- Y Gymuned – mae’n symbol o’r hyn sy’n bosibl pan fydd pobl yn dod at ei gilydd
- Ymgysylltu - sesiynau galw heibio i weld Swyddogion Cyswllt â Theuluoedd, cynghorwyr tai, timau Dechrau’n Deg, cynghorwyr a gweithwyr iechyd lleol.
Mewn blwyddyn yn unig, daeth Siop Gyfnewid Gymunedol Aberhonddu yn symbol disglair o urddas, haelioni ac undod; gan brofi fod hyd yn oed gofod bychan cyfyng yn gallu trawsnewid bywydau.

Ac fel y dywed y geiriau ar furlun y cynhwysydd: "Powys i'r Bobl."

'Rydym mor ddiolchgar i Ymddiriedolaeth y Dyn Gwyrdd am y gefnogaeth y mae’n ei rhoi i'n cymuned mewn ffyrdd mor ddiriaethol, gan y byddai wedi cymryd blynyddoedd i ni godi'r arian i fforddio prosiectau fel rhain sy'n cael effaith wirioneddol a pharhaol ar ein plant a'u teuluoedd.' - Claire Pugh, Pennaeth Ysgol yr Eglwys yng Nghymru y Priordy, Aberhonddu.